O cooperativismo galego conta desde agora cun himno propio, unha obra creada para acompañar os actos e celebracións dun movemento que leva décadas contribuíndo ao desenvolvemento económico e social de Galicia.

​

O Himno do Cooperativismo Galego presentouse oficialmente no Día do Cooperativismo Galego 2026, organizado pola Xunta de Galicia e o Consello Galego de Cooperativas. A iniciativa de crealo naceu coincidindo coa celebración do Ano Internacional das Cooperativas 2025, coa vontade de dotar ao cooperativismo galego dun símbolo compartido que reforzase a súa identidade e visibilizase os valores que inspiran este modelo empresarial.

​

O proxecto consistiu na adaptación ao galego da obra orixinal, grazas á colaboración da Secretaría Xeral da Lingua e á cesión dos dereitos por parte do Consello Superior de Cooperativas de Euskadi.

​

A versión galega conta coa letra de Claudio Rodríguez Fer e Cristina Fiaño e coa transcición musical para banda e coro realizada por Benxamín Otero. O videoclip reúne á Banda Sinfónica Galega e ao Coro Gaos, xunto coa participación de cooperativas galegas de distintos sectores, que lle poñen rostro a unha obra nacida, precisamente, da cooperación.

​

Con este himno, o cooperativismo galego incorpora un novo elemento de identidade pensado para acompañar os seus principais actos institucionais e para seguir fortalecendo o sentimento de pertenza a un movemento que ten nas persoas, na cooperación e no compromiso co territorio a súa principal razón de ser.